ZIZE PEPSHI “MË JANË PËRZIER ATDHETË“

Vitrina e librit

ZIZE PEPSHI “MË JANË PËRZIER ATDHETË“

Doli nga shtypi libri me poezi i Zize Pepshit, me titull “MË JANË PËRZIER ATDHETË“. Përmbledhja në fjalë është redaktuar nga shkrimtari dhe botuesi Nazmi Rrahmani, kurse poezia kompleton mozaikun e angazhimeve të saj në shumë fusha të jetës publike në Zvicër, qoftë ajo arsimore, kulturore dhe në fushën e angazhimeve politike. Një libër i tillë na jep me kuptuar se peronaliteti i gruas shqiptare gjithmonë ka qenë pjesë dhe strumbullar i të gjitha proceseve shoqërore, politike dhe arsimore që ka kaluar kombi ynë, qoftë i shqiptarëve të mërguar në Zvicër, dhe i atyre në hapësirën kombëtare. Poezitë e këti libri janë me motive të ndryshme, janë ndjenjat e një intelektualeje dhe të një nëne e cila me përkushtimin e pa shoq i rriti bijtë e saj në dheun e huaj: Vetëm ky element, na bënë me kuptuar për sakrificën e gruas shqiptare, prandaj motivet e poezive herë herë kanë element idilik, e herë të tjera shprehin pezmë e mllef që shoqërohet me vargun lirik, kurse gjuha elokuente e ka bërë vargun poetik më përjetues dhe me motivin e artikuluar me sukses. Libri ndahët në gjashtë cikle: „Elegji për mërgimin“, „Ndërmjet bjeshkes dhe fushës“, „Pran oxhakut të shtëpisë“, „Shurdhëria e heshtjes“, „Fluturim mbi hapësirën shqiptare“, dhe cikli me poezi humoristike „Seq fishkëllon e pëlcet kazani“, kanë ndërthrur një varg të tërë motivesh me ndjenjash të trazuara, kurse autorja tash ia prezanton lexuesit si një uvertyrë lirike e realizuar me sukses.  

Vlenë të theksohet se Zize Pepshi, ka mbi dyzet vjetë, (qysh nga Pranvera kosovare e vitit 1981), që është figura, (sidomos e femrës), më aktive në mërgatën shqiptare në Zvicër dhe tej saj. Me këtë botim, poetesha vetëm e ka kompletuar edhe më mirë mozaikun e veprimtarisë së saj në shumë fusha të jetës publike dhe intelektuale.

Vëllimin me poezi “MË JANË PËRZIER ATDHETË“, është me lidhje të fortë dhe i përgatitur teknikisht mjaftë mirë. E botoi Shtëpia Botuese, “Faik Konica”, në Prishtinë, 2021. Libri i ka 130 faqe.

St. Gallen, 20 qershor 2021. Shefqet DIBRANI