SHBA, BE dhe “Revolucioni” demokratiko-ligjor shqiptar për Reformën në Drejtësi

Skënder S. Kapiti- Nga Skënder S.KAPITI

Reforma në Drejtësi  është jetike për shqiptarët, si Kryereforma e cila do të reformojë shtetin shqiptar me standartet ligjore e demokratike moderne dhe që do të mundësojë e përshpejtojë edhe integrimin e Shqipërisë për në BE në përputhje me vullnetin e popullit shqiptar dhe të dashamirësisë e përkrahjes së SHBA-së dhe të BE-së.

Rolin kryesor në ndëmarrjen dhe në realizimin e kësaj Reforme të Drejtësisë e luajtën SHBA kunder dëshires dhe vullnetit të politikanëve , pushtetarëve ministra e gjithfarësh dhe gjyqtarëve  si dhe të gjëndjes apatike, të paralizuar dhe të mosfunksionimit të shtetit dhe shoqërisë shqiptare të kapura nga korrupsioni dhe krimi i politikës dhe  nga tërë sistemi i drejtësisë së korruptuar.

Kriminalizimi dhe korrupsioni i politikës shqiptare dhe i Sistemit  e kishin asgjësuar shtetin ligjor dhe funksionimin e Drejtësisë e të shoqërisë, dhe për pasojë ishte paralizuar edhe demokracia, shteti dhe aktiviteti i shoqërisë civile. Pra shteti demokratik dhe shoqëria civile kishin rënë në koma dhe nuk kishin aftësi të reagonin kundër krimit të politikës dhe  kundër krimit e  korrupsionit të drejtësisë që funksiononin dhe ushqenin njëra-tjetrën.

Politika dhe drejtësia  në Shqipëri  si  BASHKËMONOPOLISTËT APO TRUSTI  piramidal më i fuqishëm në marrëdhënie biznesi parazitar ekonomiko-financiar  korruptiv e kriminal  dhe i një bashkëjetese simbiotike ryshfeti, vjedhjeje, grabitjeje, krimi e pasurimi i kishin kapur dhe privatizuar liritë dhe të drejtat  politike, ekonomike,  morale, civile, juridike e pronësore të qytetarëve, të shoqërisë dhe të shtetit shqiptar

Dhe për ta nxjerrë e shpëtuar vëndin, shoqërinë dhe shtetin nga kjo gjëndje e rëndë paralize të shtetit, të demokracisë, të shoqërisë, ligjit, moralit dhe të drejtësisë ndërhynë me përkushtim dhe me vendosmëri SHBA e cila bindi dhe tërhoqi pas vetes edhe shtetet kryesore demokratike të BE-së në këtë mision historik të saj të një rëndësie të jashtzakonshme jetike dhe kombëtare  për shqiptarët, gjëndje e cila fatkeqësisht u erdhi shqiptarëve edhe nga vetvetja: prej përzgjedhjes së keqe nga ana tyre e njerëzve të tillë në krye të shtetit, të drejtësisë dhe të drejtimit të shoqërisë dhe e pamundësisë për të dalë vetë shoqëria shqiptare nga ky qorrsokak.

Prandaj Reforma në Drejtësi dhe zbatimi i saj ka përmasat dhe rëndësinë e një revolucioni demokratiko-ligjor  kundër sistemit të padrejtësisë në Shqipëri për konsolidimin e demokracisë me anë të sundimit të ligjeve demokratike të miratuara demokratisht në parlament  por vetëm thënë  më së sakti e më së vërteti që kjo reformë u miratua në sajë të imponimit dhe të presionit demokratik të ushtruar mbi politikën shqiptare  nga diplomacia dhe demokracia perendimore e SHBA-së dhe e BE-së.

Padrejtësia brënda një shteti kombëtar dhe të pavarur është armikja më e madhe e lirisë, e humanitetit dhe moralitetit të individit dhe të shoqërisë, është armikja më e madhe e patriotizmit dhe e emancipimit civil dhe social të kombit.

Nga padrejtësia në shtet që vjen prej politikës dhe prej politikanëve të tij, si rasti më shëmbullkeq i tranzicionit 25 vjecar në Shqipëri ku  gjeneroi  krimi, tradhëtia, korrupsioni ,varfëria, papunësia, eksodi  dhe destabiliteti i shoqërisë që gati disa herë provokoi rëndë edhe me  përplasje civile.

Kur pllakos padrejtësia degjeneron dhe rrënohet edhe vetë shteti, ashtu sikurse dhe kanë rënë e janë rrënuar perandoritë dhe mbretëritë më të mëdha botërore si të kohëve të lashta , të mesjetës si dhe ato të koheve moderne.

Shteti krijohet nga njerëzia, dhe kombi shqiptar ka sakrifikuar me shekuj për të pasur shtetin e vet kombëtar, për t’u cliruar nga pushtuesit  dhe prej padrejtësive mizore të tyre; ka luftuar populli shqiptar për të krijuar shtetin e vet dhe për të pasur e gëzuar  lirinë e lumturinë  dhe drejtësi e barazi ligjore. Por shqiptarët që luftuan me shekuj kundër padrejtësive dhe pushtuesve të huaj  ranë përsëri pre e padrejtësive politike, ideologjike, të krimit, të tradhëtive dhe të korrupsionit të politikanëve dhe qeveritarëve të vet gjithmonë pothuajse, por edhe shumë e më keq akoma edhe në këto 25 vitet e fundit.

Pra, deri tani  shoqëria shqiptare ka dështuar në ndërtimin e një shteti ligjor me vlera e standarte moderne shtetformuese  gjë për të cilën shoqëria nuk mund ta justifikojë e ta përjashtojë veten nga përgjegjësia për këtë realitet jo të këndshëm si pasojë e mosemancipimit demokratik dhe të paditurisë e të mosnjohjes së botës së ligjeve me të cilët funksionon e qeveriset qytetërimi modern.

Është drejtësia ajo që e mban  shtetin i cili ka si detyrë për ta ruajtur e mbrojtur shoqërinë dhe individët e saj dhe për t’ju shërbyer atyre. Kur s’ka drejtësi, shteti bie në anarki, dhe anarkia është gjëndja më e rëndë për shoqërinë. Padrejtësia në një shtet është dhe kërcënimi dhe rreziku kryesor për sovranitetin kombëtar.

Pas komunizmit diktatorial, prej 25 vitesh në fakt u vendos një regjim i  neoautoritarizmit “demokratik” i cili  më së shumti apo tërësisht ishte një libertarianizëm kaotik i lirive egoiste të  shthurura të politikës anarshiste dhe te kriminalizuar, të papërgjegjshme që e keqpërdori shtetin, ligjin, demokracinë dhe popullin si një mjet apo material njerëzor vetëm për intersa të veta.

Pra amoraliteti i paskrupullt i politikës e shkatërroi dhe drejtësinë, themelin e moralitetit njerëzor. Prandaj Reforma në Drejtësi është me të vërtetë ashtu si dhe e kanë përcaktuar ambasadorët dhe diplomacia perendimore e  SHBA-së dhe BE- së, si Reformën më të rendësisshme në historinë Shqipërisë,  dhe kjo Reformë u miratua pikërisht vetëm falë presionit të SHBA dhe BE, dhe kot mundohet e  përpiqet të llomotisë sot apo edhe nesër ndonjë segment politik apo politikan duke  menduar dhe vetëgënjyer veten se mund të gënjejë e të mashtrojë publikun për ndonjë meritë të tyren për këtë Reformë.

Kujtesa kombëtare do ta konservojë në histori si një fitore kombëtare realizimin e Reformës në Drejtësi si një merite e  popullit me ndihmën vendimtare të demokracisë perëndimore kryesisht të SHBA –së , por nga ana tjetër edhe si nje turp te madh të radhës të politikës dështake shqiptare  për zvarritjen, neglizhencën,  pengesën dhe mosdëshirën e saj për Reformën në Drejtësi si dhe për dëmin e madh kombëtar dhe anticivil, antiprogresiv dhe kundërintegral që ka luajtur politika shqiptare e këtij tranzicioni.

Le t’i shërbejë edhe Kosovës si leksion miratimi i kësaj Reformës në Drejtësi në Shqipëri, pasi edhe atje është e njejta situatë dhe i njëjti realitet i zymtë dhe korruptiv politiko-institucional dhe nuk është aspak më mirë  gjëndja dhe realiteti i drejtësisë dhe i sundimit të ligjit as atje.

Është fat i madh i kombit shqiptar dhe i dy shteteve shqiptare që kemi një mik dhe aleat të madh si SHBA.  Duhet të paktën t’u jemi mirënjohës pasi dihet tashmë se garancia vendimtare  për Pavarsinë e Shqipërisë  dhe   clirimi e krijimi i Shtetit të Pavarur të Kosovës janë mundësuar nga SHBA, ashtu si edhe për të gjitha ngjarjet e zhvillimet e tjera për demokracinë, stabilitetin, për progresin si dhe integrimin euro-atlantik të shqiptarëve dhe të të dy shtetve të tyre, përcaktues ka qenë gjithnjë roli dhe kontributi real i SHBA-së, sic ashtu që është dhe rasti më i fundit,  ky i Reformës më të madhe në historinë e Shqipërisë, realizimi i Reformës në Drejtësi.

Është koha e një gjyqi të madh, e gjyqit për ta gjykuar e ndëshkuar drejtësinë shqiptare të këtyre 25 viteve por edhe ato të kaluarës jo të largët të komunizmit: gjyqtarët, juristët, pushtetatarët dhe politikanët shqiptarë, pra te gjithe ata individe te kesaj kaste qe kane shkelur, abuzuar, vjedhur, grabitur dhe qe kane perfituar duke shkelur, spekulluar dhe manipuluar me ligjin dhe me drejtesine, me shtetin dhe me shoqërinë.

Aq i madh është zhgënjimi i shqiptarëve nga realiteti kriminal i drejtësisë dhe i politikës sa akoma edhe pas miratimit të Reformës  ata pyesin veten me të drejtë  se: “Po tani a do të ndryshojë gjë”. Dhe kthimi i  besimit të popullit te Drejtësia do të fillojë shpejt vetëm atëhere kur shqiptarët të shohin daljen para drejtësisë të politikanëve, pushtetarëve , ministrave, drejtorëve, gjyqtarëve e prokurorëve të korruptuar e të kriminalizuar.
Skënder S.KAPITI, Durrës me dt. 27.07.2016