MORA RRUGËN PËR GOLLAK

D. KrasniqiDemir Krasniqi:

MORA RRUGËN PËR GOLLAK

Mora rrugën për Gollak –
Që ta shuej mallin pak !
Por e pashë se kam gabue –
Se ma shumë malli mu shtue !

Nëpër brigje e rrugë të holla –
Nuk pashë nxanës tue shkue te shkolla !
Në rrafshinën kodrinore –
S’ pashë njeri tue ble n’ shitore !

Ku shënoheshin lindjet e rendit –
S’ pashë njeri në Zyre t’ Vendit !
N’ ambulancën shëndetësore –
S’ pashë njeri për ndihmë mjekësore !

Në vendlindjen e t’ parëve t’ mi –
S’ pashë njeri tue shkue n’ xhami !
Prej agimit e prita terrin –
Por askund s’e pashë postierin !

Nuk pashë kund asnji fshatar ,
Nuk e pashë kund as farkatar ,
Nuk pashë bujq tuj punue n’ arë ,
Tuj livrue , as tuj hedhë farë !…

Nuk pashë kund asnji kosëtarë ,
Nuk pashë kund asnji kortarë ,
Nuk pashë kund lule në bahçe –
Ishin mlue me thera kaçe !…

Prej katundit në katund –
Nuk pashë kund djep ty u përkundë !
Nëpër vatra t’ fshatit tim –
Nuk pash shpi kund tuj qitë tym !

As n’ këtë anë, as matanë përroni –
Nuk pashë gra tuj shkue te kroni !
S’ pashë hambarë, as nuk pashë furra ,
S’ pashë qilarë , as nuk pashë burra !…

Lum mbi lum e përrue mbi përrue –
Nuk pashë kund mulli tue blue !
Lagje m’ lagje tue kalue –
S’ ndjeva kund gjela tuj knue !

Nuk pashë odë, as nuk pashë strehë ,
S’ ndjeva kund nji qen tue lehë !
N’ kodra , n’ brigje , n’ lugje , n’ gropë –
Nuk pashë kije , nuk pashë lopë !

Nuk pashë mëzet , as nuk pashë mështjerra ,
Krejt kullosat ishin mbushë therra !
Nuk pashë dhi, as nuk pashë edha ,
Nuk pashë pemë, as nuk pashë bredha !…

Nuk pashë kund kope me dele ,
Krejt kullosat ishin ba zabele !
N’ brigje , n’ kodra mal mas mali –
S’ pashë gomarë, as nuk pashë kali !…

Mal mas mali , pyll mas pylli –
Nuk dëgjova jone fyelli !
Nuk lash vend kund pa vëzhgue –
S’ ndjeva kund çoban tuj knue !

Nuk lash vend pa shkelë n’ Gollak –
Nuk pashë kund krushq me bajrak ,
Nuk pashë nuse me duvak ,
As n’ divan , as në çardak !…

Ah, Gollak – malësi e shkretë ,
Paske humbë e paske tretë !
S’ paska mbet n’ ty shpirt i gjallë ,
S’ paska ma ku të shuaj mallë !…

S’ paska njeri që t’ del krah –
Buka jote ka me na vra ,
Uji i yt ka me na tha ,
Ditë të bardhë kurrë s’ kem me pa !

Gjilan, më 05.06.2016. Demir KRASNIQI