Ky nuk banë – ai nuk banë

Ky nuk banë – ai nuk banë

  • Parodi humoristiko – satirike –

 

Jam zotëri – çiftin s’ e  kam ,

Rri gjithë ditën si Kajmekam ,

N’ restorant kamën mbi kamë –

Prej sabahut tej n’ aksham !

 

Gja n’ këtë jetë, unë , nuk punoj –

Gjithë dynjanë i përgojoj !

Bash si Grof , unë , po jetoj –

Veç n’ hotel rri e pushoj .

 

Rri gjithë ditën n’ restorant –

E bajë nejen interesant !

Si Sherif , herë si Tarzan ,

Makiato pi me filxhan .

 

Pesëdhjetë cent n’ xhep nuk i kam ,

Paraqitem hijerëndë ,

Marr për goje krejt dynjanë –

Ky nuk banë e ai nuk banë !

 

Mbledh rreth vetit shumë shoqëri –

Ju mbajë ders si hoxhë n’ xhami ,

Ju shes mend , filozofi ,

Patriotizëm e histori !…

 

Politikën e njoh në gishta –

Nuk la njeri pa i ngjitë bishta !

Kallëzoj përralla e llokopendra ,

Trilloj ngjarje , trilloj rrena !…

 

Shes kanune, s’ i  ndali llafet –

Gjithë shoqnija m’i  paguajnë kafet !

Ky  hajduk e ai kopuk –

Po luftojnë veç për kolltuk !

 

Ky me fakultet , ai analfabet ,

Ky laik e ai ekspert .

Ky akademik , ai fanatik ,

Ky besnik e ai armik !…

 

Ky spiun  e ai tradhtarë ,

Ky lider e ai zagar !

Ky marksist , ai leninist ,

Ky enverist , ai stalinist !…

 

Ky titist , ai komunist ,

Bashkëpunëtor – kolaboracionist !…

Ky ballist , ai rugovist ,

Ky berishist , ai nanoist !…

 

Ky servil , ai serbofil ,

Ky katil , ai grekofil !

Ky thaçist , ai ramushist ,

Ky vrastar e ai fashist !…

 

Ky Karadak , ai drenicak ,

Ky i rrafshit , ai Gollak …

Ky llapjanë , ai opojanë ,

Ky shaljanë e ai pejanë !…

 

Ky gjilanli , ai rugovali ,

Ky malok , ai moravali …

Ky prizrenli , ai gjakovarë ,

Ky zorraxhi , ai kosovarë …

 

Ky po rrenë , ky po mashtron ,

Ky po vjedh , ky po tradhton…

Ky po fiton me tendera –

Krejt janë ba milionera !…

 

Po vjen kafja me filxhan –

Ky nuk banë e ai nuk banë !

Iku dita e praroi dielli –

Ndër shqiptarë mbeta ma i miri !

 

Gjilan, më 12.02.2006 .        Demir KRASNIQI