KUR SHOH FSHATRAT NË GOLLAK

Demir KRASNIQI:

KUR SHOH FSHATRAT NË GOLLAK

Kur shoh fshatrat në Gollak ,
Nuk qet tym asnjë oxhak –
Flakë më digjet zemra n’ bark ,
Gjumin kurrë s’e bëjë rehat !

Kur shoh shkollat zbrazët çdo klasë –
Zemra n’ bark po donë me m’ plasë !
As s’ shoh mësues, as nuk shoh nxënës –
Sikur djepi i thatë i nënës !

Askurrkush nuk ulet bankës ,
Askurrkush nuk ia thotë këngës ,
Askush s’ ia thotë leximit ,
Recitimit , bukurshkrimit !…

Kur i shoh mullinjtë e rrënuar –
Kujtoj kohërat që kanë shkuar !
Ah, sa drithërat n’ ta janë bluar ,
Miell familjet janë furnizuar !…

Sot , nuk shoh kund mullitarë ,
Nuk shoh njeri duke bartë barrë –
As me kali, as me gomarë ,
Nuk shoh lugje , as gurë të bardhë !…

Nëpër fshatrat kodrinore –
Nuk shoh kund asnjë shitore !
Nuk ndiej shitës që flet shqip ,
Që shet gaz , sheqer e krip !…

Xhamia me minare t’ gjatë –
Ka shumë vjet që ka ngelë thatë !
Ezani në te është ndalë ,
Nuk shkon kush në te me u falë !

N’ Zyre t’ Vendit , puna është ndalë –
S’ regjistron kush çikë, as djalë !
Zyra e Vendit ka mbet e shkretë –
S’ dinë kush lind, as kush ndërron jetë !…

S’ ka ma n’ oda gaz , as qiri ,
Nuk shkon n’ to ma mysafiri !
Asnjë odë ma nuk qet tym –
S’ pritet n’ to ma këngë , as gëzim !…

Nuk sheh kund ma kerre t’ kuqe ,
Nuk sheh krushq duke marrë nuse !
S’ ka vrapime për maramë ,
Nuk ka festë , Shën Gjergj , Bajram !…

S’ ka bagëti, as bujqësi ,
S’ ka bari , as blegtori ,
Kopshtari , as pemëtari ,
Shpendari , as bletari !…

Nuk ka magje , saç , kaci ,
S’ ka çerep , sitë , as tepsi …
Nuk ka vek , që banë pëlhurë ,
Nuk ka kërrabëza – çejz që thurë !

Nuk ka shpi , nuk ka oxhak ,
Nuk ka odë, nuk ka konak ,
Nuk ka sofra me bollak –
Shkretë kanë mbetë vatrat n’ Gollak !

Gjilan, më 12.09.2017. Demir KRASNIQI