EMIN ÇELIKU – TRIMI I CËRVICËS

Demir KRASNIQI:

EMIN ÇELIKU – TRIMI I CËRVICËS

Po i këndoj Emin Çelikut –
Që ia dha hakun armikut !
Po i këndoj Emin Cërvicës –
Trimit t’ luftërave , sakrificës !…

Po i këndoj Emin Xhambazit –
Nga Cërvica , afër Zajazit !
Po i këndoj Emin Kaçakut –
N’ odë të burrave , n’ ballë t’ oxhakut !

Po i këndoj trimit t’ Uskanës –
Bashkëkombësit të Sulltanës !
Po i këndoj trimit t’ Kërçovës ,
T’ Iliridës dhe t’ Kosovës !…

Emin Çeliku – zemër kreshnike ,
Luftëtar për Shqipërinë etnike !
Herët shkoj n’ rrugë të së mbarës –
Krahu i djathtë i Dervish Carës !

Emin Çeliku – trim mbi trima ,
Bënte luftën si vetëtima !
Emin Çeliku – Emin Xhambazi ,
I furishëm si tallazi !

I paepur nga trimëria ,
E ka njohur historia !
N’ luftë me turqit – prijatar ,
Gjithmonë doli fitimtar !

Emin Kaçaku – n’ moshë t’ rinisë ,
E kanë thirr burrat n’ Cërvicë !
Dhe mbarë rrethi i Kërçovës ,
Gostivarit dhe Tetovës …

Herët doli kaçak në mal –
N’ aksione kurrë s’ u ndal !
Tanzimatin e Sulltan Mexhitit –
E urrente me afsh të shpirtit !

Tanzimatin e kundërshtonte ,
Që çdo shtëpi e detyronte –
Nga një mashkull t’ mirë shqiptar ,
N’ ushtrinë turke ta çojë ushtar !

Emin Çeliku – Emin Xhambazi ,
Me do trima nga Zajazi
Dhe rrethina e Kërçovës –
Merr vendim me i dalë Zot – tokës !

Ndaj reformave të Tanzimatit –
Me i dalë Zot , qytetit , fshatit !…
Rrëzë Kalasë s’ Kërçovës shkon –
Kazermën turke e sulmon !

Kjo kazermë mbi tokë të t’ parëve –
Shumë shpejt bien në dorë t’ shqiptarëve !
Municion , armë i strehojnë –
Kur t’ ketë nevojë t’i shfrytëzojnë !

Ndjeu Sulltani për këtë telashe –
E dërgoi Hajredin Pashën ,
Ta rimerr Kërçovën nga ata shqiptarë ,
Ta vendosi rendin si ishte më parë !…

Për të vrarë shqiptarët – armë ju jep boll ,
Kokën e Emin Kaçakut , t’ ia sjellin n’ Stamboll !
Kokën e Emin Kaçakut , t’ ia sjellin dhuratë –
Që ta ruajnë për kujtime për një kohë të gjatë !

Ai Hajredin Pasha me 5000 ushtarë –
Kishte marrë drejtimin në Kërçovë me ardhë !
Kurse Emin Kaçaku vetëm 500 trima –
Kish mbledhë nga Kërçova , Zajazi e rrethina !…

Atje në fshatin Sop , kanë dalë afër Cerit –
Seç ia zunë pusinë turkut dhe asqerit !
Këtu Emin Kaçaku , me trima t’ kësaj ane –
Mirë ia kanë zanë pritën kësaj ushtrisë osmane !

Aty luftë e rreptë , fort ishte zhvillua –
Ku Emin Kaçaku , kishte komandua !
Atë Hajredin Pashën , seç e kanë tmerrua –
Humbje t’ mëdha n’ njerëz seç i kanë shkaktua !

Këtu Emin Kaçaku , rrufeshëm sulmon –
Dhe Hajredin Pashës , ushtrinë ia shkatërron !
Shumë ushtarë të vrarë , me gjak skuqen tokën –
E Hajredin Pasha , mezi e shpëtoi kokën !

Komandant Emini , luftonte pa kob –
Me shokë çliroi shokët , që iu kanë zanë rob !
N’ mbrojtje të Atdheut , kanë bërë luftë të dëlirë –
Në Kërçovë u kthyen me shokë shëndosh e mirë !

Kështu Emin Kaçakut , i priu e mbara –
Shumë shpejt mori ftesën , nga trim Dervish Cara !
T’ bashkohen së bashku n’ luftën çlirimtare
Dhe ta bëjnë çlirimin e trojeve shqiptare !

Mos t’ na dhimbet jeta , mos t’ na dhimbet trupi –
Do ta fillojmë luftën , së pari nga Shkupi !
Do ta vazhdojmë luftën n’ Prilep e Veles –
Nuk më dhimbet jeta për Atdhe të vdes !

Do ta vazhdojmë luftën , drejt kah Manastiri –
T’ gëzojnë liri shqiptarët , të jetojnë ma s’ miri !
Do ta vazhdojmë luftën , n’ Tetovë, Gostivar –
N’ gjitha viset tjera , ku jetojnë shqiptarë !

Pasi që së bashku e çliruan Shkupin –
Vazhdojnë për Veles , turkut t’ ia bëjnë turpin !
Por , ushtria turke , atje i përplasin –
Me Hajredin Pashën , Mehmed Pashë Latasin !

Disa luftëra t’ rrepta , nëpër ato male –
Për liri t’ Atdheut , nuk kishin të ndalen !
Atje komandonte , trim Emin Kaçaku –
Iu tregonte turqve se si derdhet gjaku !

Emin Xhambaz – Kërçova , biri i këtij dheu –
Gjatë natës sulmonte rreptë , si Skënderbeu !
Gjatë natës sulmonte me rreptësi t’ papara –
Ushtrisë turke i shkaktonte humbje nëpër çadra !

Trimi Dervish Cara , luftëtar në log –
Bashkë me shokët e tij , ishte zënë rob !
Bashkë me shokët e tij , në Stamboll dërgohet ,
Por , Emin Kaçaku i gjallë nuk dorëzohet !

E dinte se i është kërkuar dhuratë koka e tij –
Nga Sulltan Mexhiti , që ishte mjekërzi !
Luftë t’ pabarabartë me turqit kish filluar –
Vriste nga dy anët , turqit që e kishin rrethuar !

Ato krisma armësh që zbrazeshin mbi tokë –
I dëgjonte Selim Braja , së bashku me shokë !
Komandantit t’ vet , me një trimëri të rrallë –
Hiq pa u hamend , në ndihmë i ka dalë !

Forcat artilerike turke , sa shpejt i largon –
Komandant Emin Çelikun , të gjallë e shpëton !
N’ përleshje me turqit – i plagosur kishte ra ,
Por , nga emri i Zotit – ai nuk ishte vra !

Emini i plagosur ishte shtri për dhe ,
Por koka e tij , nuk iu kishte pre !
Siç kishte kërkuar Sulltani ma parë –
Për kurajë t’ ushtrisë – kundër kryengritësve shqiptarë !

Pas këtyre ngjarjeve të mëdha historike ,
Luftërave , qëndresave të mëdha heroike –
Komandanti i njohur , trim Emin Kaçaku ,
Me shokë t’ vet tërhiqet n’ drejtim Karadaku !

Me shokë t’ vet tërhiqet n’ Karadak të Shkupit –
Që ta vazhdoi luftën flakë me flakë me turqit !
Që ta vazhdoi luftën me shokët e tij –
Në Kosovë deri n’ Cetinje të Malit të Zi !

Pas këtyre luftimeve , me të fortat bindje –
Me shokët e luftës , kthehet në vendlindje !
Luftëtarët shpërndahen n’ grupe t’ vogla kaçake –
Në vendlindje t’ veta bëjnë jetë për merake !

Këtu Emin Çeliku, bashkë me Halil Rekën –
N’ rrethana kaçake , do ta kalojnë jetën !
N’ malet e Kërçovës dhe n’ male të Dibrës –
Do t’ bëjnë jetë kaçake , si dy yje t’ dritës !

Duke i çmuar lartë trimëritë e tij ,
Ndaj pushtetit turk në luftë për liri –
Nga krerët shqiptarë – drejtues të Kuvendit ,
Thirret të merr pjesë n’ Lidhjen e Prizrenit !

T’ vjen si delegat – përfaqësues nga Kërçova ,
Se kështu e kërkonte Shqipëria e Kosova !
Kështu Emin Çeliku i rrethit kërçovarë –
N’ Lidhjen e Prizrenit , ai pjesë kishte marrë !

Dhjetë vite më vonë , vendi ndizej zjarr –
Në Luftën e Dibrës , prapë pjesë kishte marrë !
Kundër Hajredin Pashës dhe ushtrisë së tij –
I dha grusht të rëndë – shembull n’ histori !

Më 1912 , në vitin e Pavarësisë
Së Shtetit Shqiptar të Nënë Shqipërisë –
I kthehet familjes, i kthehet shtëpisë ,
Merret me punë t’ fushës edhe të bujqësisë !…

Falë përvojës së tij të madhe luftarake ,
Edhe strategjisë së rryer ushtarake –
Më 1913, i shpëton Masakrës ,
Që ishte skenuar në fshatin e Bllatës !

Aty kishte shpëtuar , mbi te pa e ba namin ,
Bashkë me djemtë e tij , Ademin dhe Bajramin –
Nga dora gjakatare e Mikajlit t’ Brodit ,
Që n’ atë trevë po njihej si kasap i popullit !

Moj Cërvicë krenare , djepi i kreshnikut –
Lavdi veprës s’ madhe të Emin Çelikut !
Moj Cërvicë shqiptare , shtylla e bajrakut –
Lavdi veprës s’ madhe të Emin Kaçakut !

Moj Cërvicë bujare , fshat afër Zajazit –
Lavdi veprës s’ madhe të Emin Xhambazit !
Moj Cërvicë fshatare , vatër heroike –
Lavdi veprës mbarëkombëtare dhe patriotike !

Moj Cërvicë Kërçove , trimëreshë flamurtare –
Lavdi veprës madhështore edhe atdhetare !
Moj Cërvicë përparimtare , moj vatër fisnike –
Lavdi veprave t’ luftëtarëve të Shqipërisë etnike !

Gjilan, më 18.08.2017. Demir KRASNIQI